Alineatorët janë maskerina transparente, të holla dhe pothuajse të padukshme, që vendosen mbi dhëmbë dhe i drejtojnë ngadalë, hap pas hapi, drejt pozicionit të duhur. Janë një alternativë moderne ndaj aparatit fiks me brackets dhe tela. Në këtë udhëzues shpjegojmë çfarë janë, si funksionojnë, për kë janë të përshtatshëm dhe si zhvillohet trajtimi te Roma Dental Clinic në Durrës.
Çfarë janë alineatorët?
Alineatori është një maskerinë prej plastike mjekësore transparente, e punuar me porosi sipas dhëmbëve tuaj. Trajtimi nuk bëhet me një maskerinë të vetme, por me një seri maskerinash. Secila prej tyre është pak më ndryshe nga e mëparshmja dhe i lëviz dhëmbët me fraksione milimetri. Duke i ndërruar sipas planit, dhëmbët drejtohen gradualisht derisa arrijnë pozicionin përfundimtar.
Meqenëse janë transparente dhe ngjiten mirë pas dhëmbëve, në jetën e përditshme vihen re shumë pak. Për këtë arsye shumë të rritur dhe adoleshentë i preferojnë ndaj aparatit fiks.
Si funksionojnë?
Çdo maskerinë ushtron një presion të lehtë dhe të kontrolluar mbi dhëmbë të caktuar. Ky presion bën që kocka përreth dhëmbit të rimodelohet ngadalë, dhe dhëmbi lëviz në drejtimin e planifikuar. Çdo set mbahet dy javë, pastaj kalohet te seti tjetër.
Në disa raste, mbi disa dhëmbë vendosen ngjitëse të vogla me ngjyrën e dhëmbit (attachments). Ato ndihmojnë maskerinën të kapet më mirë dhe t’i lëvizë dhëmbët me më shumë saktësi. Pas trajtimit hiqen pa lënë gjurmë.
Si zhvillohet trajtimi te Roma Dental Clinic
- Vizita e parë dhe vlerësimi. Kontrollojmë dhëmbët, mishrat dhe kafshimin, dhe bëjmë radiografinë dixhitale direkt në klinikë. Ju shpjegojmë nëse alineatorët janë zgjidhja e duhur për rastin tuaj.
- Skanimi dixhital 3D. Në vend të masave me pastë, dhëmbët skanohen me skaner intraoral. Procedura është e shpejtë, e rehatshme dhe shumë e saktë.
- Plani dixhital. Në kompjuter planifikohet lëvizja e çdo dhëmbi, hap pas hapi. Para se të nisim, mund të shihni simulimin e rezultatit përfundimtar dhe numrin e përafërt të seteve.
- Dorëzimi i alineatorëve. Vendosen ngjitëset (nëse duhen) dhe ju mësojmë si t’i vendosni, t’i hiqni dhe t’i pastroni maskerinat. Procedura nuk dhemb dhe nuk kërkon anestezi.
- Kontrollet periodike. Ju shohim çdo disa javë për të kontrolluar që dhëmbët ndjekin planin dhe për t’ju dhënë setet e radhës.
- Mbajtja e rezultatit. Në fund ju japim një mbajtës (retainer), që dhëmbët të mos kthehen në pozicionin e vjetër.
Për cilat raste janë të përshtatshëm?
Alineatorët japin rezultate shumë të mira në shumë raste të zakonshme, si:
- dhëmbë të shtrënguar ose të mbivendosur;
- hapësira (boshllëqe) midis dhëmbëve;
- probleme të lehta dhe të mesme të kafshimit;
- dhëmbë që janë zhvendosur sërish pas një trajtimi të mëparshëm me aparat.
Në raste më komplekse, për shembull kur kërkohen lëvizje të mëdha të dhëmbëve ose korrigjime të rëndësishme të nofullave, aparati fiks mund të jetë zgjidhja më e sigurt. Këtë e vendosim bashkë pas vlerësimit klinik dhe radiografisë.
Përparësitë e alineatorëve
- Pothuajse të padukshëm: të tjerët rrallë e kuptojnë që jeni në trajtim.
- Të rehatshëm: nuk kanë tela dhe brackets që gërvishtin buzët ose faqet.
- Higjienë më e lehtë: hiqen për të larë dhëmbët normalisht, me furçë dhe fill.
- Pa kufizime ushqimore: meqë hiqen gjatë ngrënies, mund të hani çfarë të doni.
- Plan i qartë që në fillim: falë planit dixhital e dini që në nisje si do të duket rezultati.
- Më pak urgjenca: nuk ka tela që këputen apo brackets që shqiten.
Çfarë duhet të dini para se të nisni
Alineatorët funksionojnë vetëm kur janë në gojë. Duhen mbajtur 20–22 orë në ditë, edhe gjatë natës, dhe hiqen vetëm për të ngrënë, për të pirë diçka tjetër përveç ujit dhe për të larë dhëmbët. Nëse mbahen më pak, dhëmbët nuk e ndjekin planin dhe trajtimi zgjatet. Pra, rezultati varet shumë nga disiplina e pacientit.
A dhembin?
Nuk dhembin, por në 1–2 ditët e para të çdo seti të ri mund të ndjeni një presion ose shtrëngim të lehtë. Kjo është shenjë që maskerinat po punojnë dhe kalon shpejt. Disa njerëz në ditët e para flasin pak më ndryshe, por goja mësohet brenda pak ditësh.
Sa zgjat trajtimi?
Trajtimi me alineatorë zgjat zakonisht 5 deri në 10 muaj, në varësi të rastit. Pas vizitës së parë dhe planit dixhital ju japim kohëzgjatjen e saktë të parashikuar për rastin tuaj.
Alineatorë apo aparat fiks?
Të dyja metodat janë efektive. Alineatorët janë pothuajse të padukshëm, të rehatshëm dhe hiqen, por kërkojnë që t’i mbani rregullisht gjatë gjithë ditës. Aparati fiks punon gjatë gjithë kohës pa varur nga pacienti dhe është shpesh zgjidhja më e mirë për lëvizje të mëdha ose raste komplekse. Te Roma Dental Clinic ju këshillojmë me ndershmëri cila metodë i përshtatet më mirë dhëmbëve dhe mënyrës suaj të jetesës. Më shumë informacion gjeni te faqja jonë e Ortodoncisë.
Jeta e përditshme me alineatorë
- Ngrënia: hiqini maskerinat para çdo vakti dhe lani dhëmbët para se t’i vendosni përsëri.
- Pirja: me maskerina në gojë pini vetëm ujë. Kafeja, çaji, pijet me sheqer ose me ngjyrë mund t’i njollosin maskerinat dhe të dëmtojnë dhëmbët.
- Kutia: kur nuk i keni në gojë, mbajini gjithmonë në kutinë e tyre, që të mos humbasin apo thyhen.
- Pastrimi: shpëlajini me ujë të ftohtë ose të vakët, kurrë me ujë të nxehtë, sepse deformohen.
Udhëzime më të hollësishme gjeni në artikullin tonë Si të kujdeseni për alineatorët tuaj.
Pas trajtimit: mbajtësi (retainer)
Kur dhëmbët arrijnë pozicionin e ri, kanë prirjen të kthehen pak pas. Për këtë arsye, pas trajtimit përdoret një mbajtës: një maskerinë transparente që mbahet zakonisht natën, ose një tel i hollë i ngjitur nga ana e brendshme e dhëmbëve. Mbajtësi e ruan rezultatin për vite me radhë.
Në çfarë moshe mund të përdoren?
Alineatorët përdoren te të rriturit dhe te adoleshentët, kur dhëmbët e përhershëm kanë dalë. Nuk ka moshë maksimale: për sa kohë dhëmbët dhe mishrat janë të shëndetshëm, trajtimi mund të bëhet në çdo moshë. Për fëmijët më të vegjël vlerësojmë rast pas rasti zgjidhjen më të mirë.
Sa kushtojnë?
Te Roma Dental Clinic trajtimi me alineatorë transparentë kushton 50.000 lek për një nofull (arkadë), pra 100.000 lek për të dyja nofullat. Pas vizitës së parë ju themi qartë nëse trajtimi duhet për njërën nofull apo për të dyja, para se të nisni.
Pyetje të shpeshta
A duken kur flas ose buzëqesh?
Shumë pak. Janë transparente dhe ngjiten pas dhëmbëve, ndaj në distancë normale bisede zakonisht nuk vihen re.
Çfarë ndodh nëse humbas ose thyej një maskerinë?
Na kontaktoni sa më shpejt. Zakonisht vazhdoni me setin e mëparshëm ose me setin e radhës, sipas udhëzimit tonë, derisa të përgatitet zëvendësimi.
A mund t’i heq për një rast të veçantë?
Po, për disa orë nuk ka problem, por mos e bëni zakon. Çdo orë pa maskerina e ngadalëson trajtimin.
A mund të bëj zbardhje gjatë trajtimit?
Zbardhja zakonisht bëhet në fund të trajtimit, kur dhëmbët janë në pozicionin përfundimtar. Do ta diskutojmë bashkë gjatë kontrolleve.
Rezervoni një vizitë
Nëse doni të dini nëse alineatorët janë zgjidhja e duhur për ju, rezervoni një vizitë te Roma Dental Clinic në Durrës. Me skanimin dixhital 3D dhe planin e personalizuar, që në vizitën e parë do ta kuptoni qartë si mund të ndryshojë buzëqeshja juaj. Na kontaktoni këtu.